خبرنامہ سندھ

کراچی (آئی این پی )کراچی میں پولیس کے ہاتھوں گرفتار دہشت گرد منیر احمد نے سنسنی خیز انکشافات کیے ہیں۔دہشت گرد نے وزیرستان میں فورسزپر حملے کرنے کا بھی اعتراف کیا ہے۔ میڈیا رپورٹس کے مطابق کالعدم تحریک طالبان کے گرفتار دہشت گرد منیر احمد عرف مفتی صاحب نے دوران تفتیش انکشاف کیا ہے کہ اسکے 18 اہم ساتھی حساس اداروں، رینجرز اور پولیس کے ہاتھوں مقابلے میں مارے جاچکے ہیں۔ ملزم کا شمار کالعدم تحریک طالبان کراچی کے امیر خان زمان کے قریبی ساتھیوں میں ہوتا ہے۔ملزم کے مطابق اس نے خان زمان محسود کے ساتھ وزیرستان سے اسلحہ چلانے کی ٹریننگ لی۔ ٹریننگ کے بعد ملزمان کراچی آگئے جہاں اسنے کراچی میں راجا تنویر کالونی میں رہائش اختیار کرلی۔ملزم نے وزیرستان کے کمانڈر حکیم اللہ محسود اور خان زمان محسود کے ساتھ فورسز پر حملے کئے۔ بھتہ نہ ملنے پر ملزم کے ساتھی سجاد لنگڑا نے حنیف اافریدی نامی شخص کو قتل کیا۔ملزم نے انکشاف کیا ہے کہ خان زمان خان محسود وزیرستان میں روپوش ہے اور وہیں سے نیٹ ورک چلا رہا ہے۔