مسقط ۔(ملت آن لائن) ایشین ہاکی چیمپئنز ٹرافی (آج) جمعرات سے اومان کے دارالحکومت مسقط میں شروع ہوگی۔ تفصیلات کے مطابق ایونٹ میں بھارت کی ٹیم ٹائٹل کا دفاع کرے گی۔ ایونٹ کے پہلے روز دو میچز کھیلے جائینگے، پہلا میچ جاپان اور ملائیشیا کے درمیان جبکہ دوسرا میچ دفاعی چیمپئن بھارت اور میزبان اومان کے درمیان کھیلا جائیگا۔ ایونٹ میں 6 مختلف ممالک کی ٹیمیں ٹائٹل کے حصول کے لئے پنجہ آزمائی کرینگی جن میں میزبان اومان، پاکستان، بھارت، ملائیشیا، جنوبی کوریا اور جاپان شامل ہیں۔ ایشین ہاکی چیمپئنز ٹرافی کے کامیابی انعقاد کے لئے تمام تر تیاریاں مکمل ہوگئیں۔ پاکستان ٹیم اپنے پانچ سنگل گروپ میچ کھیلے گی۔ ایونٹ کے پوزیشن میچز 27 اکتوبر کو کھیلے جائیں گے جبکہ فائنل اور تیسری پوزیشن کے میچز 28 اکتوبر کو کھیلے جائینگے۔ پاکستان کی ٹیم اپنا پہلا میچ (کل) جمعہ کو جنوبی کوریا کے خلاف کھیلے گی، دوسرا میچ 20 اکتوبرکو روایتی حریف بھارت کے خلاف کھیلے گی، تیسرا میچ 22 اکتوبر سے میزبان اومان کے خلاف کھیلے گی، چوتھا میچ 24 اکتوبر کو جاپان کے خلاف کھیلے گی اور اپنے گروپ کا پانچواں اور آخری میچ 25 اکتوبر کو ملائیشیا کے خلاف کھیلے گی۔ ایشین ہاکی چیمپئنز ٹرافی کی تاریخ میں پاکستان اور بھارت کی ٹیمیں اس کا ٹائٹل دو، دو مرتبہ جیت چکی ہیں۔ ایشین ہاکی چیمپئنز ٹرافی کا آغاز 2011ء میں ہوا تھا جس کا فائنل روایتی حریفوں پاکستان اور بھارت کے درمیان کھیلا گیا تھا جس میں بھارت نے پاکستان کو شکست دیکر پہلا ٹائٹل جیتا تھا۔
خبرنامہ
ایشین ہاکی چیمپئنز ٹرافی (آج) اومان میں شروع ہوگی، پاکستان کی ٹیم اپنا پہلا میچ (کل) جنوبی کوریا کے خلاف کھیلے گی
![](http://www.millat.com/wp-content/uploads/2018/10/Hockey.jpg)