لاہور (ملت + آئی این پی) پاکستان کرکٹ بورڈ کے چیئرمین شہر یار خان نے کہا ہے کہ آئی سی سی کے چیئرمین ششانک منوہر کے استعفی کا افسوس ہوا ہے ،دنیائے کرکٹ کیلئے ان کی خدمات قابل تحسین ہیں،قذافی سٹیڈیم لاہور میں میڈیا سے غیر رسمی گفتگو کرتے ہوئے شہر یار نے بتایا کہ ابھی پتہ نہیں ہے کہ آئی سی سی کا اگلا چیئرمین کون ہوگا ، اگلے دوماہ میں ہونے والے آئی سی سی کے دو اجلاس میں بگ تھری کے خاتمہ پر پیش رفت ہوگی،پی سی بی اس سلسلہ میں اپنا موقف آئی سی سی کو دے چکی ہے ،ایک سوال کے جواب میں انہوں نے بتایا کہ آئی سی سی کے چیئرمین ششانک منوہر کے استعفی سے بگ تھری کے خاتمہ کے حوالے سے کوئی فرق نہیں پڑے گا کیونکہ بگ تھری کے خاتمہ کے معاملہ میں پہلے ہی معاملات پر پیش رفت ہوچکی ہے،شہر یار خان نے کہا کہ پی سی بی دنیا ئے کرکٹ کی مختلف کرکٹ ٹیموں کو پاکستان میں مدعو کرنے کی کوششیں جاری رکھے ہوئے ہے اور اس سلسلہ میں بنگلہ دیش کرکٹ بورڈ سے بات چیت جاری ہے، انہوں نے کہاکہ قومی کرکٹ ٹیم نے دورہ ویسٹ انڈیز کیلئے بھرپور تیاری کی ہے اور میر ی نیک خواہشات ٹیم کے ساتھ ہیں ،ٹیم کے کھلاڑی اور ٹیم مینجمنٹ کے اراکین اپنی اپنی ذمہ داریوں سے بخوبی آگاہ ہیں اور مجھے پوری امید ہے کہ قومی ٹیم دورہ ویسٹ انڈیز میں بہتر پرفارمنس کا مظاہرہ کر ے گی ۔
خبرنامہ
ششانک منوہر کے استعفیٰ سے بگ تھری کے خاتمہ پر کوئی فرق نہیں پڑیگا،شہریار خان
![](http://www.millat.com/wp-content/uploads/2017/02/shahar-yar-khan.jpg)