کرائسٹ چرچ (ملت + اے پی پی) زلزلے کے خطرے اور سونامی کی وارننگ کے باوجود پاکستان اور نیوزی لینڈ کی کرکٹ ٹیموں کے درمیان دو ٹیسٹ میچوں پر مشتمل سیریز کا پہلا میچ جمعرات سے کرائسٹ چرچ میں شروع ہوگا۔ دونوں ٹیمیں کرائسٹ چرچ پہنچ چکی ہیں اور پریکٹس کرنے میں مصروف ہیں، پاکستان کرکٹ ٹیم کی قیادت مصباح الحق کرینگے جبکہ میزبان ٹیم کی قیادت کین ولیمسن کرینگے۔ پاکستان اور نیوزی لینڈ کے درمیان پہلا ٹیسٹ میچ زلزلے سے متاثرہ کرائسٹ چرچ میں ہی شیڈول ہے۔ پاکستانی ٹیسٹ سکواڈ میں مصباح الحق (کپتان)، اظہر علی، سمیع اسلم، شرجیل خان، یونس خان، اسد شفیق، بابر اعظم، سرفراز احمد، محمد رضوان، یاسر شاہ، محمد نواز، محمد عامر، وہاب ریاض، راحت علی، سہیل خان، اور عمران خان سینئر شامل ہیں جبکہ ٹیم مینجمنٹ میں وسیم باری ( مینجر)، مکی آرتھر (ہیڈ کوچ)، گرانٹ فلاور (بیٹنگ کوچ) سٹیو رکسن (فیلڈنگ کوچ)، اظہر محمود (بولنگ کوچ)، گرانٹ لوڈن (فٹنس کوچ)، شاہد اسلم (انچارج ٹوئر آپریشنز)، لیفٹنٹ کرنل (ر) احمد ایاز ( سیکورٹی مینجر) ، شین ہیز( فزیو تھراپسٹ )، طلحہ اعجاز اینالسٹ شامل ہیں ۔گزشتہ روز نیوزی لینڈ کے شہر کرائسٹ چرچ میں 7.4 شدت کا زلزلہ آیا تھا جس کے بعد سونامی کی وارننگ جاری کردی گئی اور کیویز کے دیس میں موجود پاکستانی مینز اور ویمنز ٹیم کے تمام اراکین بالکل محفوظ ہیں۔ امریکی جیولوجیکل سروے کے مطابق وسطی نیوزی لینڈ میں 7.4 شدت کا زلزلہ آیا جس سے جنوبی جزیرے کے شمال مشرقی ساحل سے سونامی ٹکرا گیا ہے۔ نیوزی لینڈ کی وزارت سول ڈیفنس اور ایمرجنسی مینجمنٹ نے خطرناک لہریں بلند ہونے کا خدشہ ظاہر کرتے ہوئے بتایا ہے کہ تین میٹر بلند لہریں بلند ہو سکتی ہیں لہٰذا لوگ اسے سنجیدگی سے لیں اور ساحلی علاقوں سے دور یا پھر اونچی عمارتوں پر منتقل ہو جائیں۔ پاکستانی ٹیم نیوزی لینڈ کے خلاف پہلے ٹیسٹ میچ سے قبل تین روزہ ٹور میچ کھیلنے کیلئے نیلسن میں موجود تھی لیکن بارش کے سبب تین روزہ میچ بغیر کوئی گیند پھینکے ہی ختم ہو گیا۔ دونوں ٹیموں کے درمیان پہلا ٹیسٹ (کل) سے 21 نومبر تک ہیگلے اوول، کرائسٹ چرچ جبکہ دوسرا اور آخری ٹیسٹ 25 سے 29 نومبر تک سیڈن پارک، ہیملٹن میں کھیلا جائے گا۔
خبرنامہ
پاکستان اور نیوزی لینڈ کی کرکٹ ٹیموں کے درمیان پہلا ٹیسٹ میچ جمعرات سے شروع ہوگا
![](http://www.millat.com/wp-content/uploads/2016/11/Pakistan-vs-New-Zealand.jpg)