دبئی: (ملت+اے پی پی) پاکستان نے آسٹریلیا کیخلاف انڈر16 ٹی 20 کرکٹ سیریز بھی جیت لی، ٹیم نے دوسرے مقابلے میں حریف کو 6 وکٹ سے ٹھکانے لگایا، نسیم شاہ ، محمد طحہ اور عارش علی نے شاندار بولنگ کرتے ہوئے کینگروز کو 108 پر محدود کردیا، روحیل نذیر ون ڈے سیریز کی فارم برقرار نہیں رکھ پائے اور اس بار 5 رنز بناکرپویلین واپس لوٹ گئے ، زید خان نے 6 چوکوں کی مدد سے 35 گیندوں پر 44 رنز اسکور کیے۔ دوسرے میچ میں کینگروزنے ٹاس جیتنے کے بعد بیٹنگ کا فیصلہ کیا اور مقررہ 20 اوورز سے ایک گیند قبل 108رنز پر پوری ٹیم میدان بدر ہوگئی، نسیم شاہ ، محمد طحہ اور عارش علی نے تباہ کن بولنگ کرتے ہوئے حریف بیٹنگ لائن کو وکٹ پر تادیر ٹکنے نہیں دیا، نسیم نے 22 جبکہ محمد طحہ نے 14رنز کے عوض 3،3 وکٹوں کا سودا کیا ، عارش نے 23رنز دیتے ہوئے 2 وکٹیں اپنے نام کیں،زیڈ کیگرن نے سب سے زیادہ 47رنز بنائے، انھوں نے 42 گیندوں کا سامنا کرتے ہوئے 5 چوکے اور ایک چھکا جڑا، سی اسمتھ 38 گیندوں پر 30رنز بنانے میں کامیاب ہوئے، مہمان ٹیم کے دیگر 8 بیٹسمینوں کا انفرادی اسکور سنگل ہندسے تک محدود رہا، عبداللہ منظور اور زید خان نے ایک ایک کھلاڑی کو آؤٹ کیا۔ بعدازاں 109 کے آسان ہدف کا تعاقب کرنے میں پاکستانی ٹیم کا آغاز پُراعتماد نہیں رہا، اوپنر روحیل نذیر 4 گیندوں پر 5 رنز بنانے کے بعد سویلی کی گیند پر ایوا کا کیچ بن گئے، انھوں نے ایک چوکا لگایا، تاہم دوسرے افتتاحی بیٹسمین زید خان نے پُراعتماد انداز میں بیٹنگ کرتے ہوئے 6 چوکوں کی مدد سے 35 گیندوں پر 44 رنز اسکور کیے، عبدالہادی 12رنز بنانے کے بعد سویلی کی گیند پرکلارک کے ہاتھوں جکڑے گئے، محمد طحہ 2 اور طحہ محمود 9 رنز سے آگے نہیں بڑھ پائے، زین بن فاروق نے 21 گیندوں پر 19 رنز ناٹ آؤٹ بنائے، آسٹریلوی بولرز کی کارکردگی بھی انتہائی ناقص رہی،انھوں نے 18رنز ایکسٹراز میں دیکر پاکستانی جیت میں ہاتھ بٹایا، اس میں 15 وائیڈز شامل رہیں، سی سویلی 26رنز دیکر3 کھلاڑیوں کو آؤٹ کرنے میں کامیاب رہے۔
خبرنامہ
پاکستان نے آسٹریلیا کیخلاف انڈر 16 ٹی 20 سیریز جیت لی
![](http://www.millat.com/wp-content/uploads/2017/01/711477-team-1484599427-308-640x480.gif.png)