خبرنامہ

اسحاق ڈار 10 روز میں پیش ہوں، نہ آنے پر اشتہاری قرار دے دینگے: عدالت
اسلام آباد:(ملت آن لائن) آمدن سے زائد اثاثہ جات ریفرنس میں سابق وزیر خزانہ اسحاق ڈار کی مسلسل عدم پیشی پر انہیں اشتہاری قرار دینے کیلئے کارروائی کا آغاز ہو گیا۔ اسحاق ڈار کی طلبی کا اشتہار عدالتی نوٹس بورڈ اور انکی رہائشگاہوں کے باہر آویزاں کر کے دس روز میں پیش ہونے کا حکم دیا ہے۔ تفصیلات کے مطابق احتساب عدالت کے جج محمد بشیر کے دستخطوں سے جاری اسحاق ڈار کی طلبی کا اشتہار عدالتی نوٹس بورڈ پرچسپاں کر دیا گیا جبکہ ان کی اسلام آباد اور لاہور میں رہائشگاہوں کے باہر بھی اشتہار آویزاں کر دیئے گئے ہیں۔ احتساب عدالت کی جانب سے 21 نومبر کو جاری کئے گئے اشتہار میں اسحاق ڈار کو 10 روز میں پیش ہونے کا حکم دیا گیا ہے، عدم پیشی کی صورت میں سابق وزیرخزانہ کو اشتہاری ملزم قرار دیا جائے گا۔واضح رہے اسحاق ڈار بطور ملزم اب تک 7 مرتبہ عدالت کے سامنے پیش ہوئے۔ اب تک 5 گواہوں نے اپنے بیانات قلمبند کرائے، تین پر جرح مکمل کر لی گئی۔ 14 نومبر کو عدم حاضری پر عدالت نے استثنیٰ کی درخواست مسترد کرتے ہوئے نا قابل ضمانت وارنٹ گرفتاری جاری کیے جبکہ 21 نومبر کو عدالت نے سابق وزیر خزانہ کو مفرور قرار دیا۔